الرئيسية / آراء حرة / مواصفات المدير الناجح و النظرة القديمة للإدارة

مواصفات المدير الناجح و النظرة القديمة للإدارة

كتب : محمد مشرف

كان فيه مناقشة من شوية كده مع صديق كان كاتب إن لو حد قدم على وظيفة ولقي إن مديرة بيفهم اقل منه في المجال اللي هو بيقدم فيه انه يهرب علشان ده مينفعش وده كده مقدمة للفشل.

الموضوع ده للاسف هو النظرة القديمة للإدارة اللي مسيطره على مصر بشكل خاص والوطن العربي بشكل عام وهي إن المدير لازم يكون هو أكتر واحد بيفهم في الفريق ويكون بيفهم أحسن من كل الناس اللي تحتيه.

الكلام ده غلط ليه؟! علشان لو المدير هو افضل الناس في الفريق من الناحية التقنية, يبقي كده ده فريق فاشل, ويبقي المدير ده هو عنق الزجاجة للفريق اللي لو غاب يوم ولا اخد أجازة, الفريق كله بيموت ومش بيطلع حاجة.

المدير الناجح مش وظيفته أبدا انه يبقي انجح من كل الناس اللي تحتيه, بالعكس, المدير الناجح لازم كل فرد في أفراد فريقه يكون أحسن منه في اللي هو بيعمله. يعني اللي مثلا بيعمل تطبيقات للموبيل, لازم يكون بيفهم عن المدير في ده. اللي بيعمل شغل UI لازم يكون بيفهم عن المدير في ده. اللي شغال في الحاجات اللي ليها علاقة بالانظمه لازم يكون بيفهم عن المدير في ده.

طب المدير الناجح المفروض يكون بيعمل إيه؟!
يكون بيعمل الاتي:

1- يكون قادر انه يصنع فريق كل عضو فيه متميز في اللي بيعمله ويختار افضل العناصر الممكنه اللي لازم ولابد تكون افضل منه في مجال تخصصها
2- يبني البيئة المناسبة اللي تقدر تخلي الناس ديه تطلع أحسن حاجة عندها من غير أي نوع من الضغط ويطلعوا اللي عندهم وهم حاسين انهم عايزين يعملوا كده.
3- يوجد التوازن الذهبي مابين مصلحة الموظف وإيه بيخليه سعيد ومابين مصلحة الشركة وإيه يخليها ناجحة.
4- يكون حلقة الوصل الطبيعية مابين الجزء التقني والجزء التجاري ويكون أكتر واحد ملم بالتفاصيل ديه في الفريق
5- من الناحية التقنية, يكون عنده رؤية أفقية للمشروع ككل وعارف كل حاجة فيه من منظور عالي (high level)
6- يكون قادر على استغلال العناصر اللي عنده بشكل امثل. سواء عناصر بشريه (عن طريق انه استخدامها بالشكل الامثل على حسب معرفتها التقنية وسماتها الشخصية, أو ميزانية موجودة, أو فرصة منتج معين في السوق, الخ

طب هيتقال السؤال المعتاد: لو المدير مش هو أكتر واحد فاهم, إيه يضمن إن الناس متضحكش عليه و “تقرطسة” ؟!

إجابة السؤال ده بقي هو اللي بيخلي حد ينفع يكون مدير وحد تاني مينفعش

شاهد أيضاً

عن شعيرة الحج والعيد لدى المتدين

كتب : طارق حجي في البداية يبدو وكأن شعيرة الحج غير متناسبة مع العيد، فالعيد …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: Content is protected !!