الرئيسية / آراء حرة / قانون “الجريمة الإلكترونية” المصري : شرح لقانون مكافحة جرائم تقنية المعلومات

قانون “الجريمة الإلكترونية” المصري : شرح لقانون مكافحة جرائم تقنية المعلومات

 كتب : محمد شحاتة

الرئيس السيسي وافق إمبارح على قانون “مكافحة جرائم تقنية المعلومات” واللي بيتقال عليه بردوا قانون “الجريمة الإلكترونية”.

– وعشان القانون يمسنا كلنا حبينا نوضح شوية حاجات فيه

– القانون بيمس كل مستخدمي الإنترنت، وفي عقوبات كبيرة جدًا على أفعال بيعملها أغلب مستخدمي الإنترنت في مصر بشكل يومي، عشان كده هنشرح بعض مواد القانون ده اللي ممكن توديك السجن حرفيًا وإنت مش عارف إنت عملت إيه.

– لو استخدمت الواي فاي بتاع حد تاني، أو أخدت وصلة إنترنت من جارك اللي خدمة الإنترنت باسمه (زي ما بيحصل في أغلب القرى والمناطق الشعبية)، أو مثلًا اتفرجت على ماتش مقرصن ومتذاع على الإنترنت، فإنت كده بتعرض نفسك للحبس مدة متقلش عن 3 شهور وغرامة بين 10 و50 ألف جنيه أو بإحدى العقوبتين، وده بموجب نص المادة 13 من القانون.

– لو إنت من هواة عمل الحسابات “البارودي” أو الساخرة، زي اللي بتتريق على السياسيين والشخصيات العامة والفنانين، فإنت بتعرض نفسك للحبس مدة متقلش عن 3 شهور ولغرامة ممكن توصل لـ300 ألف جنيه، وده بموجب نص المادة 24 من القانون.

– المادة 7 من القانون بتسمح بحجب أي موقع إلكتروني لو قام ببث ما “يشكل تهديدًا للأمن القومي أو عرض أمن البلاد أو اقتصادها القومي للخطر”. ورغم إن الحجب ده بيتم بإذن قضائي، لكن في انتقادات كتير للمادة دي لإن تعريف الأمن القومي في القانون واسع وفضفاض أوي وبيشمل “كل ما يتصل باستقلال واستقرار وأمن الوطن ووحدته وسلامة أراضيه، وما يتعلق بشئون رئاسة الجمهورية ومجلس الدفاع الوطني ومجلس الأمن القومي، ووزارة الدفاع والإنتاج الحربي، ووزارة الداخلية، والمخابرات العامة، وهيئة الرقابة الإدارية، والأجهزة التابعة لتلك الجهات”. يعني ببساطة أي كلام في أي حاجة خاصة المواضيع دي ممكن يعتبر تهديد للأمن القومي والموقع يتحجب.

– لو إنت دخلت بالعمد أو بالخطأ على موقع أو حساب خاص أو نظام معلوماتي محظور الدخول عليه (زي المواقع المحجوبة واللي عددها في مصر وصل حوالي 500 موقع) فإنت ممكن تتعاقب بالحبس مدة لا تقل عن سنة، وبغرامة من 50 لـ 100 ألف جنيه، أو إحدى هاتين العقوبتين، وده بحسب نص المادة 15 من القانون.

– المادة 25 من القانون بتنص على عقاب “من اعتدى على أي من المبادئ أو القيم الأسرية في المجتمع المصري”، بالحبس مدة لا تقل عن 6 شهور، وبغرامة من 50 لـ100 ألف جنيه، أو باحدى هاتين العقوبتين. ودي مادة فضفاضة لإنه مش متحدد يعني إيه “المبادئ أو القيم الأسرية” وبالتالي ممكن أي كلام في موضوع متعلق بالمجتمع يعتبر اعتداء على مبادئه وقيمه يستوجب العقاب.

شاهد أيضاً

عن شعيرة الحج والعيد لدى المتدين

كتب : طارق حجي في البداية يبدو وكأن شعيرة الحج غير متناسبة مع العيد، فالعيد …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: Content is protected !!