الرئيسية / آراء حرة / محمد رمضان : مش فنان ثوري مثقف و لا هو شبح وبلطجي ؟؟؟

محمد رمضان : مش فنان ثوري مثقف و لا هو شبح وبلطجي ؟؟؟

كتب : محمود قاسم

بالصدفة تابعت محمد رمضان من أول لحظاته ، قبل الثورة محمد رمضان كان عندي في ال friend list وقتها كان فنان مغمور محدش يعرفه و كان بيحاول يظهر بصورة الفنان المثقف صاحب المباديء لكن ضحالة ثقافته كانت ديما عائق في ده و كان بيظهر بسهولة انه بيدعي شيء لا علاقة له بيه من قريب أو بعيد.

محمد وقتها كان عايش علي فكرة انه احمد ذكي الجديد ، و دوره في مسلسل السندريلا الي قام فيه بدور احمد ذكي زود ده معاه ، و لما محدش طلبه في اي عمل بعده إلا لما مني ذكي طلبته في احكي يا شهرزاد في ٢٠٠٩ اعتقد وقتها كان فرحان و انه بينقي الأدوار الهادفة الخ وفاكر انه راح عمل فوتو سيشن في شرم و كان مبسطود بيها جدا .

لما قامت ثورة يناير محمد شاف أن دي فرصته انه يبروز نفسه كفنان مثقف و صاحب مباديء و نزل التحرير و حاول ياخد فرصته علي المنصات ، مكنش بيعرف يطلع ع المنصة الرئيسية ف بداء يطلع ع المنصات الفرعية أوقات يقول شعر أو يقول كلام حماسي سياسي زي الفيديو الي تحت ده وهو في التحرير وقت الثورة بيتكلم ع عظمة شعب مصر لكن ضحالة ثقافته كان ديما عائق قصاد الصورة دي زي ما هو واضح في الفيديو ده برضة.

بعد الثورة و بعد ما محمد رمضان فشل انه يطلع منها بأي شيء لا عرف يبقي فنان ثوري أو فنان مثقف أو الناس حتي تعرف انه شارك في الثورة ، اختفي محمد رمضان ، اكونته اتقفل و كل شيء عنه انقطع إلا أنه فجأة ظهر بشكل جديد مختلف عن الي حاول يعمله لسنين طويلة ظهر محمد رمضان في ٢٠١٢ ك الألماني و عبدو موته !

اعتقادي أن في الزحمة دي في عين لقطت محمد رمضان و طموحة و انه عاوز يوصل و يتشهر و العين دي شافت انه يقدر يخدم سيناريو معين و كانت التجربة في عبدو موته و نجحت بشدة و بقي محمد رمضان هو صاحب سيناريو ” الألهاء ” الفني الاول.

محمد رمضان استفاد شهرة و ملايين و علاقات و قوة رهيبة و العين استفادت سيناريو الهاء قوي ، ألهاء لمحبي رمضان الي بينبهروا ب افلامة و شخصية ” الشبح ” الي عايشها بره و جوه الشاشة و الهاء لكارهيه الي ح يفضلوا يهجموه و يشغلوا مساحة نقاش كبيرة خاصة بيه .

في الفترة الأخيرة نجم رمضان بداء يقل بسبب أن العين بقيت بتحلبه في حملات دعائية كتير و ده ظهر في إيرادات أفلامه و مشاهدات مسلسله فبدأت العين توصل للقمة معاه عن طريق فيديوهات عجيبة بيطلع محمد رمضان يكايد فيها الناس و يغيظهم و الحملة نجحت الحقيقة ورجعت محمد رمضان كمصدر الإلهام الأول و لكن ..

محمد رمضان ” اتحلب ” لغاية ما نشف و الفيديوهات الى تهزقه هو قبل أي شخص دي اخر نقطة من حلبه، محمد رمضان مش فنان ثوري مثقف و لا هو شبح و بلطجي محمد رمضان ممثل جيد عمل كل شيء و اي شيء عشان يوصل الشهرة و توقعي انه خلال ٤ أو ٥ سنين محمد رمضان ح يتعرض للنسيان و فشل تام و بالتحديد أول ما يظهر خليفه ليه تشوفه ” العين”.

شاهد أيضاً

كريستيانو رونالدو : مهارات وانجازات غير مسبوقة في كرة القدم

كتب : محمود مهدلي خلينا متفقين إن كريستيانو رونالدو عمل حاجات في لعبة كرة القدم، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: Content is protected !!